Ap Farmers Soil Health Cards 2025: రైతులకు శుభవార్త: త్వరలోనే భూ ఆరోగ్య కార్డుల పంపిణీ ప్రారంభం

రైతులకు గుడ్ న్యూస్.. త్వరలోనే భూ ఆరోగ్య కార్డుల పంపిణీ! – Ap Farmers Soil Health Cards 2025

రైతులకు శుభవార్త. 🌾 ఆంధ్రప్రదేశ్ ప్రభుత్వం అన్నదాతలకు అండగా నిలవడానికి మరో మంచి కార్యక్రమం చేపట్టింది. పంటల దిగుబడిని మెరుగుపరచడానికి, రైతులకు అవసరమైన సమాచారం అందించడానికి భూసార పరీక్షలు నిర్వహించి భూ ఆరోగ్య కార్డులు అందజేయడం మొదలైంది. పశ్చిమ గోదావరి జిల్లాలో ఈ కార్డుల పంపిణీ ప్రారంభమైంది. త్వరలోనే రాష్ట్రంలోని అన్ని జిల్లాలకు ఈ కార్డులు అందుబాటులోకి రానున్నాయి.

మనిషి ఆరోగ్యాన్ని తెలుసుకోవడానికి ఎలాగైతే ప్రతి ఏటా పరీక్షలు అవసరమో, భూమికి కూడా అలా భూసార పరీక్షలు తప్పనిసరి. ఈ పరీక్షల ద్వారా భూమిలో ఏ పోషకాలు ఎక్కువగా ఉన్నాయో, ఏవి తక్కువగా ఉన్నాయో తెలుసుకోవచ్చు. దానికి తగ్గట్టుగా ఎరువులు, మందులు వాడితే మంచి నాణ్యతతో కూడిన దిగుబడిని సాధించవచ్చు.

గతంలో భూసార పరీక్షలు సరిగా జరగలేదనే విమర్శలు వచ్చిన నేపథ్యంలో ప్రభుత్వం ఈసారి ప్రత్యేక శ్రద్ధ చూపింది. గతంలో మిగిలిపోయిన నమూనాలను సేకరించి పరీక్షలు పూర్తి చేసింది. వాటి ఆధారంగా రైతులకు భూ ఆరోగ్య కార్డులు ఇవ్వడం ప్రారంభమైంది. ప్రస్తుతం పశ్చిమగోదావరి జిల్లా రైతులు ఈ కార్డులు పొందుతున్నారు. త్వరలోనే మిగతా జిల్లాల్లోనూ పంపిణీ జరగనుంది.

2025-26 సంవత్సరానికి సంబంధించిన భూ ఆరోగ్య కార్డులు రాష్ట్రంలోని అన్ని రైతులకు అందజేయాలని వ్యవసాయశాఖ అధికారులు స్పష్టం చేశారు. ఈ కార్డులు అందుబాటులోకి రావడం వల్ల రైతులు తమ భూమి పరిస్థితిని సులభంగా తెలుసుకొని సరైన పద్ధతుల్లో సాగు చేసుకునే అవకాశం లభించనుంది.